العيد...بقلم الكاتب ياسر أشرف

العيد
===
يارب دايما فى المواعيد يهل برضه هلال العيد
والكل يفرح ويبقى سعيد واللبس الوان كده وجديد
يعنى السعادة للاطفال والبهجة لينا كبار وصغار
وتبقى المحبة هى شعار ومعايدة دايما ليل ونهار
حتى الحدائق والاشجار فرحتها برضه بالزوار
ونزور قرايب كده وجيران والفرحة تبقى اكيد عنوان
ويبعد مابينا اى شيطان ولاغل ظاهر او عدوان
وكفاية دفع فى عديات وفلوس بتطلع خد او هات
ونفتكر فى ذكريات والفرحة فى جنينة الحيوانات
هوايتى كانت مع بعض الناس الفرجة على قط ونسناس
نرمى له موز ويا سودانى يفرح يغنى فى اغانى
ومهارته كانت فى التقشير وكأنه طفل او حتى كبير
ولو رميت له كده فى ازاز يصرخ يقول انا مش نسناس
وناكل جيلاتى وغزل بنات والفرحة طايرة فى بالونات
ومحشى اكيد وسندوتشات وحاجة ساقعة برضه ساعات
ونجرى ونلعب بالكورة بسعادة بالغة محفورة
ونروح نزور ملك الغابة زئيره يرعب بغرابة
والفيل حلاوته فى زلومته ياكل ويشكر لعزومته
والدب ياخد دش كمان بعادة دايمة زى زمان
وطيور ارانب مع عصافير وطاووس جماله بشكل خطير
وجاموس ده برى ويا حمير ونعام زرافة ورقبه طويل
والفرحة كانت فى التقديم للاكل ليهم مع تفكير
ونزور حدائق وقناطر وسواقنا دايما كده شاطر
وفى الملاهى ركوب مراجيح بضحكة جامدة وسرعة ريح
وساعات نزور الاهرامات والليل بندخل السينمات
نغسل همومنا طول العام ومذاكرة صعبة طول الايام
ولا ننسى برضه فى يوم العيد نحيى زوجة واهل شهيد
والكل يفرح يبقى سعيد ويجعل حياتكو كلها عيد
ودايما تكونوا مبسوطين وكل سنة وانتم طيبين.
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون