نفسي أفرح...بقلم الشّاعر محمود عبد الخالق

..................................نفسي أفرح ...............................
آه يابلدي وأنت سندي
نفسي أفرح واعيش يومين
كان دا كله فين ياربي
مستخبي فوق الجبين
قالوا شمعة قلت دمعة
قالوا بسمة قلت فين
جابوا فتوى جبت رقوى
ربي يحرصهم يا عين
أسرني شندي عملت هندي
كأني ضمن المعجبين
عملوا نجوى عملت عجوى
رقصوني على غنوتين
ركبوا فرسة ركبت فرصة
لونوني قوام لونين
طبخوا طبخة طبخت سبخة
لقتني ضمن المعزومين
أصل الحكاية لا تقول شكاية
اخرسوا يامجرمين
بابا قال لي شفت فني
ايه ياماما رحتي فين
أبويا صايع شكله ضايع
فار مجنن قطتتين
خلو بالكم من عيالكم
لما تكبر هتقول يامين
آه ياناسنا كسرتوا فاسنا
زئير أسدنا جوا العرين
آه يا أرضي وانت عرضي
ما كان حدانا فدانين
ايه ياقدري لسه بدري
ليه همامنا يبات حزين
دموعنا شابت قلوبنا دابت
غابت شموسنا ويا الحنين
قوم ياولدي خد بيدي
جه شمالنا دبح اليمين
امسك سلاحك هو فلاحك
نجي كل الغرقانين
انا راح اغني باللي شاغلني
يفهم غنايا المجروحين
على الربابة ساقي الصبابة
الدنيا غابة واروح لمين
لما الكتابة تكون سبابة
للشرفا ومدح الكذابين
تبقى النهاية ذي البداية
والأرض تصرخ م النصابين
وقام طابور قوام يدور
حلقة ومليانة طبالين
ومغنواتي علطول يهاتي
يرقص كرقص المداحين
يرفع عمامة تقوم قيامة
حي - مدد يامجذوبين
بين كرامة الشيخ سلامة
تلقى الحيارى متجمعين
قوم ياباشا خد لك قماشا
مالك ومال العريانين
الدنيا حلوة كنجاة وسلوة
أما حتة مزتين
ولو معاهم ويكون حداهم
الشقرة أم المنجتين
لا تقول سعاد ولا وداد
مافي أحلى م العنقودين
ساعات ساعات أشوف حاجات
أشوف الجنة وكمان نارين
ولما ابات وفت الثبات
أحس كاني بقيت تنين
واحد لنومي وواحد لعومي
ألقى السفينة للموعودين
أرجع وأقول اسمع يازول
الرب واحد خليك متين
مش معنى اني توهت سني
خلاص بقيت م المخدوعين
وأقول كمان كان ياما كان
غراب يغازل عصفورين
غار الحمام ترك اليمام
قتل الغراب وبات سجين
في سجنه قال خضوعي محال
لاما كرامة أوحور وعين
أصل الرجولة كل الفحولة
تثبت ياصحبي وتوفي دين
فيفي هايصة والبنت لايصة
أخرتنا باين عليها طين
طلع واطيها نزل عاليها
صار الفساد ياناس روتين
ضاعت فلوسنا وبان فلسنا
و علي السلالم رقاصين
يافرحة كانت صاحية ونامت
ومن بكانا الدواوين
افرح يامجدي ضيعت مجدي
أمام عدانا موطيين
اسأل مجرب اياك تقرب
فرعون وموسى متكررين
الحق ياصحبي الخور سرح بي
حكايتنا صارت عار وشين
أقول لقلبي والله ماذنبي
الذنب ذنب الموهومين
ياللي انت رايح كتر فضايح
خلينا نفرح في الشمتانين
آخر مقال للكون عقال
والأخرة دار للمتقين
بقلمي | محمود عبد الخالق عطيه المحامي